साइनो समचारदाता
काठमाडौं । सुदुरपूर्व ताप्लेजुङ जिल्लाबाट संसदीय चुनाबमा पहिलो पटक निर्वाचित भएका योगेश भट्टराई बुधबारदेखि मन्त्री भएका छन् । भट्टराईले निकटतम् प्रतिद्वन्द्वी नेपाली कांग्रेसका केशव दाहाललाई पराजित गरेका थिए । उनले २९,४७९ पाएका थिए भने दाहालले १६,८८८ मत प्राप्त गरेका गरेका थिए ।
गत २०७५ फागुन १५ गते तात्कालिन मन्त्री रविन्द्र अधिकारीको निधन भएपछि संस्कृति, पर्यटन तथा नागरिक उड्डयन मन्त्रालय ५ महिनाअघिदेखि प्रधानमन्त्री ओली आफैले सम्हाल्दै आएका थिए । नेपाल कम्युनष्टि पार्टी (नेकपा)का स्थायी कमिटि सदस्य समेत रहेका भट्टराईले संस्कृति, पर्यटन तथा नागरिक उड्डयन मन्त्रालय समाल्नेछन् । प्रतिनिधि तथा प्रदेश सभा निर्वाचनको बेला वर्तमान प्रधानमन्त्री केपी शर्मा ओलीले ताप्लेजुङ्गे मतदाताहरुलाई भट्टराई जिताएमा मन्त्री बनाउने आश्वसान दिएका थिए । भट्टराईले अपरान्ह्र ४ बजे पछि सपथ ग्रहण गरेका छन् । स्रोतकाअनुसार प्रधानमन्त्री केपी शर्मा ओलीले आजै दिउँसो भट्टराईलाई वालुवाटार बोलाएर संस्कृति, पर्यटन तथा नागरिक उड्डयन मन्त्रालयको जिम्मेवारी सम्हाल्न भनेका थिए । नेताहरुसँगको सल्लाहमा प्रधानमन्त्री ओलीले भट्टराईलाई संस्कृति, पर्यटन तथा नागरिक उड्डयन मन्त्रालयको जिम्मेवारी दिन लागेका हुन् ।
मन्त्री भट्टराईको जन्म विक्रम संवत २०२३ साल भदौ २१ गते ताप्लेजुङको साँघुमा भएको हो । उनको बुबाको नाम भीमलाल भट्टराई र आमाको नाम महेन्द्रादेवी भट्टराई हो । समाज शास्त्र र मानव शास्त्र विषयमा एमए उत्तीर्ण गरेका उनी झापा विद्रोहबाट प्रभावित भएर स्कूल पढ्ने समयमै बामपन्थी राजनीतिमा लागेका थिए । २०३७ सालमा अनेरास्ववियुको राजनीति थालेका उनी २०५१ सालमा अनेरास्ववियूको अध्यक्ष समेत भए । २०६४ सालको पहिलो संविधान सभा चुनावमा पनि काठमाडौं क्षेत्र नम्बर ६ बाट र २०७० सालको दोस्रो चुनावमा क्षेत्र नंबर ५ बाट उम्मेद्वार बने पनि पराजित भएका थिए ।


















