गोपाल काफ्ले/ पथरी, २७ असोज
मोफसलकै सर्वाधीक लोकप्रिय छैठौं बेलबारी अन्तराष्ट्रिय आमन्त्रण गोल्डकप २०८० को सम्पुर्ण तयारी पुरा भएको छ । भोली असोज २८ गते देखि सुरु हुने प्रतियोगितामा प्रतियोगितामा लिग च्याम्पियन सहित ८ टिमको सहभागिता रहेको छ ।

स्थानीय खेलाडी उत्पादन गरी फुटवलको विकास गर्ने उदेश्यका साथ डाँगिहाट फुटवल क्लवले २०७४ सालबाट गोल्डकप सुरु गर्दै आएको हो । आयोजक डाँगीहाट युथ क्लवले शुक्रवार पत्रकार संम्मेलनको आयोजना गरि छैठौं संस्करणको प्रतियोगिताको सम्पुर्ण तयारी पुरा भएको बताएको छ । सोहि कार्यक्रममा छैठौं बेलबारीमा अन्तराष्ट्रिय गोल्डकप प्रतियोगीतामा सहभागी आयोजक टिमका लागि जर्सी प्रदान भएको छ । प्रत्येक गोल्डकपमा जर्सी सौजन्य गर्दै आउनु भएकी हिराकुमारी श्रेष्ठले ५१ हजार बरावरको जर्सी प्रदान गर्नु भएको छ । सोहि अवसरमा आयोजक डाँगीहाट युथ क्लवले श्रेष्ठलाई सम्मान गरेको छ ।


गोल्ड कपको विजेताले ८ लाख र उपविजेताले ५ लाख पुरस्कार प्राप्त गर्ने छ । २०७४ सालबाट सुरु भएको बेलबारी नगरपालिकाको गौरवको प्रतियोगिता हो । असोज २८ गतेदेखि कार्तिक ४ गते सम्म संचालन हुने प्रतियोगितामा लिग च्याम्पियन चर्च ब्वाईज काठमाण्डौले यो सिजनको पहिलो गोल्डकप सुरु गर्दै छ । छैठौं संस्करणको गोल्डकपमा विभागीय टोलीले भने स्थान पाएको छैन ।
छैठौं संस्करणको अन्तराष्ट्रिय आमन्त्रण गोल्डकपमा भारतको एक टिम, काठमाण्डौको दुई र मोफसलका उत्कृष्ट पाँच क्लवको सहभागिता रहेको छ । प्रतियोगितामा लिग च्याम्पियन चर्च ब्वाईज काठमाण्डौ, विग्रेड ब्वाईज क्लव काठमाण्डौ, सहलेश युवा क्लव सिरहा, रारा फुटबल क्लब धनकुटा, विर्तामोड युनाईटेड झापा, भोजपुर जिल्ला फुटबल क्लब भोजपुर, युकेएफसी भारत र आयोजक डॉगीहाट युथ क्लव डाँगीहाट गरी ८ वटा टिम सहभागी हुने छ ।

बेलबारी गोल्डकप बेलबारी नगरपालिकाको गौरवको प्रतियोगिता तथा मोरङको ठुलो धनराशीको प्रतियोगिता हो । गोल्ड कपको विजेताले अघिल्लो सिजन झै यो सिजन पनि ८ लाख र उपविजेताले ५ लाख रुपयाँ पुरस्कार राशी प्राप्त गर्ने छ । प्रतियोगितामा विधागत तर्फ उत्कृष्ट खेलाडी, उत्कृष्ट गोल्डकिपर, उत्कृष्ट डिफेण्डर, उत्कृष्ट मिडफिल्डर, उत्कृष्ट कोच, सर्वाधिक गोलकर्ता, उदीयमान खेलाडीलाई नगद सहित पुरस्कृत र हरेक दिनको म्यान अफ दि म्याच खेलाडीलाई नगद पुरस्कार प्रदान गरिने आयोजक क्लबका अध्यक्ष बिक्रम बान्तवा राइले जानकारी दिनुभयो ।

प्रतियोगिता सञ्चालनका लागि अनुमानित रू ६२ लाख ९० हजार खर्च र ६९ लाख ४० हजार आम्दानी हुने आयोजकले अनुमान गरेको छ । राष्ट्रिय तथा ए डिभिजन क्लवका खेलाडीहरुले प्रतिस्पर्दा गर्ने प्रतियोगितामा बेलबारी नगरपालीकाको मुख्य सहयोग रहने आयोजकले जनाएको छ । मुख्य प्रायोजक आरजु राईस मिल र सहप्रायोजक द रिभर ओभरसिज, मल्टिमिसन ट्रेनिङ सेन्टर धरान र दुबोर्ग वियरको रहेको छ । प्रतियोगिता डाँगीहाट फुटबल क्लबको आयोजनामा लक्ष्मी मा वीको खेल मैदानमा संचालन हुदै छ ।

















