साइनो समाचारदाता काठमाडौँ । उपनेता सुवास नेम्वाङलाई भावी प्रधानमन्त्री बनाउन प्रधानमन्त्री केपी शर्मा ओलीले प्रस्ताव गरेका छन् । आफूले प्रधानमन्त्री पद त्याग्नु पर्ने भए सहमतिमै नेम्वाङलाई प्रधानमन्त्री बनाउने तुरुप ओलीले फ्याकेका हुन् । बुधबार दिउँसो ओली प्रचण्डबिच भएको छलफलमा ओलीले नेम्वाङको नाम अघि सारेको बताइएको छ ।
मलाई हटाउने नै हो भने हामी बाहेकबाट विकल्प खोजौँ नेम्वाङलाई प्रधानमन्त्री बनाऔँ भन्दै ओलीको राखेको प्रस्तावप्रति दाहालले कुनै प्रतिक्रिया नजनाएको बताइएको छ । नेकपाभित्र ओलीले विधि र प्रक्रिया मिचेर स्वाइच्छाचारी रुपमा पार्टी र सरकार चलाएको आरोप दाहाल नेपाल पक्षले लगाएको छ । उनीहरुले यसपटक ओलीलाई दुवै पदबाट राजीनामा गराउने रणनीतिका साथ अघि बढाएका छन् । ओलीलाई राजीनामा गराउने पक्षमा स्थायी समितिका ४५ मध्ये ३० जना सदस्य दाहाल नेपाल पक्षमा उभिएका छन् ।
















