साइनो समाचारदाता /पथरीे, ५ माघ
पथरी शनिश्चरे नगरपालिकाले नगर भित्र खेलिने खेलहरुलाई मध्यनजर गर्दै खेलकुद महोत्सव (नगर ओलम्पीक) गर्ने भएको छ । माघ ६ देखि १५ सम्म हुने ‘पथरी शनिश्चरे नगर खेलकुद महोत्सव २०८०’ (नगर ओलम्पीक) मा ७ वटा विधामा प्रतिस्पर्धा हुने नगरले पत्रकार सम्मेलनको आयोजना गरि जानकारी दिएको छ ।

नगरले पहिलो पटक “खेलकुद राष्ट्रको शान, स्थानीय खेलाडी उत्पादन हाम्रो अभियान” भन्ने मुल नाराका साथ खेलकुदमा नयाँ आयमको सुरु गरेको छ । नगर भित्र रहेका खेलाडीको पहिचान र हौसला प्रदान गर्दै सिक्ने र केहि नौलो कार्यक्रम गर्ने उदेश्यले खेलकुद महोत्सव (नगर ओलम्पीक) को आयोजना गरेको खेलकुद विकास समिति संयोजक दिपक राईले बताउनुभयो । सकेसम्म बढि खेलहरू समावेस गर्ने कोसिस गरेका छौ पहिलो पटक भएकाले व्यवस्थापन गर्न कठिन भइरहेको संयोजक राईले बताउनु भयो । महोत्सव नगरकै गौरव भएकाले यसलाई सफल बनाउन सम्पुर्ण नगरबासीको लाग्न संयोजक राईले अनुरोध गर्नुभयो । माघ ६ गते हुने शनिवार प्रस्तावित पथरी रंगशालामा उद्घाटन हुने कार्यक्रमको अन्तिम चरणमा पुगेको छ ।
नगरले आयोजना गरेको खेलमा फुटबल, तेक्वान्दो, कराँते, र मिनि म्याराथन (दौड) बुद्धिचाल (चेस),
भलिवल र क्रिकेट रहेको छ । जस्मा फुटबल, तेक्वान्दो, कराँते, र मिनि म्याराथन (दौड) महिला र पुरुष दुबै विधामा हुने समितिका सदस्य सचिव तथा नगर शिक्षा तथा खेलकुद शाखाका अधिर्कत नविन खुलालले जानकारी दिनु भयो । बुद्धिचाल (चेस) खुल्ला रहने छ भने भलिवल, क्रिकेट, पुरुष विधामा प्रतिस्पर्धा हुने नगर खेलकुद संयोजक दिपक राईले जानकारी दिनु भयो ।
नगरले खेलकुदको वार्षिक कार्यक्रम अन्तरगत पहिलो पटक महोत्सवका गर्न लागेको हो । १४ लाख ३१ हजारको बजेटमा हुन लागेको महोत्सवमा फुटबलका १० वटा टिम, क्रिकेटमा ९ वटा, भलिवलमा ७ वटा टिमले सहभागी जनाएका छन । कराँतेमा पुरुष ३७ र महिला २० जना, तेक्वान्दोमा ५० जना, बुद्धिचालमा हाल सम्म ८० जनाको नाम दर्ता भएको छ भने मिनि म्याराथनका लागि ३० जनाले नाम दर्ता गराएको पत्रकार सम्मेलनमा जानकारी गराएको छ ।

खेलकुदका कार्यक्रमहरु बुद्धिचाल सिनभिलेज पार्टी प्यालेसमा, क्रिकेट जिरीखिम्ती मैदानमा र अन्य खेलहरू प्रस्तावि पथरी रंगशाला जाँतेमोडमा हुने आयोजकले जानकारी दिएको छ । फुटबल प्रतियोगितामा विजेता टिमले नगद १ लाख, उपविजेतालाई ५० हजार, महिला तर्फ विजेतालाई १० हजार र उपविजेतालाई ५ हजार नगद ट्रफी, मेडल रहेको छ । भलिवल खेलमा प्रथम हुनेले २५ हजार र दोस्रोले १५ हजार, क्रिकेटमा पहिलो २० र दोस्रो १५ हजार पुरस्कार प्राप्त गर्ने छन । कराँते र तेक्वान्दोमा प्रथम पुरस्कार ५ हजारका दरले रहने छ भने मिनि म्याराथनमा प्रथम ६ हजार, दोस्रो ४ हजार र तेस्रो हुनेले २ हजारका दरले नगद पुरस्कार पाउने छन ।
फुटबलमा प्रत्येक खेलमा म्यान अफ दी म्याच र विधागत पुरस्कार तर्फ उत्कृष्ट खेलाडीलाई गोल्डेन बल, गोल्डेन बुट र गोल्डेन ग्लोव्सले पुरस्कृत गरिने छ । पत्रकार सम्मेलनमा फुटबल, क्रिकेट र भलिबल प्रतियोगिताको खेल तालिका पनि सार्वजानिक गरिएको छ ।
















