पथरीशनिश्चरे ,बैशाख २४ । मध्य मोरङको पथरीशनिश्चरे नगरपालिकामा यति बेला स्थानीय तह निर्वाचनको प्रचारप्रसार उत्कर्षमा पुगेको छ । नेपाली कांग्रेस २०४८ पछिको लगतार हारलाई पल्टाउने दाउमा छ । नेकपा एमाले भने आफ्नो आधार क्षेत्रलाई सुरक्षित राख्न जोडबल गरिरहेको छ ।
नेकपा माओवादी केन्द्र नेकपा समाजवादी आफ्नो अस्तित्वको लडाईमा छन् ।पथरीशनिश्चरेमा नेपाली कांग्रेसले नगेन्द्र सुब्बा , एमालेले तत्कालिन पथरी गाविसका अध्यक्ष मोहन तुम्वापो र माओवादी समाजवादी गठन्धनले माओवादीका दिननाथ तिम्सिनालाई मेयर पदको उम्मेद्वार बनाएका छन् । मूख्य प्रतिस्पर्धा हुने नेपाली कांग्रेस र एमाले बीच हुने स्थानी मतदाता बताउँछन् । नेपाली कांग्रेसले पार्टी राजनीतिमा सतिसाल जस्तै दृढ नगेन्द्र सुब्बालाई मेयरको उम्मेद्वार बनाएको छ । थोरै बोल्ने धेरै गर्ने सुब्बाको बानी छ ।
कांग्रेसका नगेन्द्र सुब्बा को हुन् ?
२०४० सालमा पथरी बजारमा बसाई आएका सुब्बा पार्टीका पुराना कार्यकर्ता हुन् । पार्टीको स्थायी कार्यकर्ता भएर चार दशक काम गरेका सुब्बालाई यो पटक नेपाली कांग्रेसको उम्मेद्वार बनाएको छ । सुब्बा भन्छन्– पार्टी संगठनमा सधैं खाई नखाई हिडें । उमेर ६६ वर्ष पुग्यो । बल्ल पार्टीले पत्यायो । सुब्बा हारसँग कहिल्यै बिचलित भएनन् । निरन्तर पार्टी संगठनमा लागि रहे । बाबु बाजे नै कांग्रेसी, त्यसैले उनी पनि कांग्रेस भए । २०१३ सालमा जाँतेमा जन्मिएका सुब्बा धरानको पब्लिक हाइस्कुलमा पढ्दा नै नेविसंघको सदस्य बने । एसएलसी पास गरेर काठमाडौंको त्रिचन्द्र कलेज भर्ना भएका उनको त्यहीँ राजनीतिक संगत बढ्यो । राजनीति नशा जस्तै भयो । त्यस पछि उनी तत्कालिन प्रतिबन्धित नेपाली कांग्ेसले गरेको सत्याग्रहमा सहभागि भए । सोही क्रममा उनलाई ६ महिना केन्द्रीय कारागारमा जेल सजाय भयो । जेलबाट छुटेपछि पनि सुब्बा राजनीतिबाट थाकेनन् । भन्छन्–जनमत संग्रहमा बहुदल जिताउने अभियानमा लागें ।

२०४६÷०४७ सालको आन्दोलनमा सुब्बा फेरि पक्राउ परे । भण्टाबारीको गोदाममा लगेर उनी लगायतका कांग्रेसी कार्यकर्तालाई एकै ठाउँमा ५ दिनसम्म कोचेर राख्यो । बहुदल आएपछि ९ औं महाधिवेशन पछि उनी ३ कार्यकाल तत्कालिन पथरी गाविसको गाउँ सभापति बने । १२ औं महाधिवेशनमा पार्टीको क्षेत्रीय सदस्य बनेका सुब्बा १३ औं महाधिवेशनमा महाधिवेशन प्रतिनिधि निर्वाचित भए । १४ औं महाधिवेशनमा क्षेत्रीय प्रतिनिधिमा हारेका सुब्बा आन्तरिक चुनाब हार्दैमा किन गल्थे र रु उनी हारेर पनि झन सक्रिय भए । लामो समयसम्म पार्टीमा उनले गरेको कामको मूल्याङ्कन गर्दै उनलाई नेपाली कांग्रेसले मेयरको टिकट दियो । यतिबेला उनी नगरबासीको मन जित्ने अभियानमा सक्रिय छन् । भन्छन्– द्वन्द्वका समयमा कांग्रेस र हाम्रा कार्यकर्ता माथि माओवादीको गिद्धे दृष्टि थियो । हामी बिचलित भएनौं । धेरैलाई पार्टी छोड्न बाध्य बनाइयो । तर हामीले कांग्रेस बचाएर राख्यौं । जसले कांग्रेसको बिगत बुझेको छ । तिनका लागि नगेन्द्र सुब्बाले टिकट पाउनु स्वाभाविक हो । नयाँ साथीहरूमा केही समस्या भए त्यसलाई बिर्सिदिन सुब्बाले आग्रह गर्नुभयो ।

नगेन्द्र सुब्बा पथरीशनिश्चरे नगरलाई स्मार्ट शहर बनाउने सपना देखिरहनु भएको छ । फराकिला सडक । टोल टोलका सडकमा सडक बत्ती , मूख्य बजारमा सीसी टिभी जडान । सुकुम्बासी समस्या स्थायी रुपमा समाधान । फोहोर मैला ब्यवस्थापनका नगरको आफ्नै डम्पिङ साइड निर्माण सुब्बाका मूख्य योजना हुन् । नगरका सबै वडालाई जोडेर चक्रपथ निर्माण गर्ने उहाँको महत्वकांक्षी योजना छ । नगरको आफ्नै कार्यालय निर्माण । एमालेले आदिवासी जनजाति संग्रहालय बनाउने भनेर बारम्बार यहाँका जनजातिको भोट बटुल्यो । तर ,न संग्रहालय बन्यो । न बन्ने कुनै छाँटकाँट छ । सुब्बा भन्नुहुन्छ –एमालेमा ईच्छा शक्ति देखिएन । पथरीशनिश्चरे जस्तो सम्भावना युक्त शहरमा एउटा रंगशाला छैन् । ५ वर्षमा माखो मारेनन् अहिले आएर मीठा कुरा गरिरहेका छन् । उनले प्रत्येक वर्ष पथरीशनिश्चरे गोल्ड कपको आयोजना गर्ने , नगरमा सञ्चालन भएका लिग फुटबल, लिग क्रिकेट र अन्य सबै खेलका लागि बजेटको ब्यवस्था मिलाउने बताए ।

नगरको आन्तरिक स्रोत प्रति सुब्बा सन्तुष्ठ छैनन् । भन्छन्– भोट आउँदैन भनेर करको दायरा बढाउन सकिएको छैन् । कर घटाउने र दायरा बढाउने हो भने आन्तरिक स्रोत बढाउन सकिन्छ । उनले भने –सबै नगरबासीलाई कुनै न कुनै प्रकार नगरसँग जोड्नु पर्छ । किसान, मजदुर , टेम्पो चालक, रिक्सा चालक, घरधनी , पशुपालक, साना तथा ब्यापारी ,उद्योगी सबैसँग हातेमालो नगरी समृद्ध नगर बनाउन सकिन्न । उनले ५ भित्र नगरको आन्तरिक आम्दानी १५ करोड बनाउने योजना आफूसँग भएको दाबी गरे ।
















