साइनाे समाचारदाता पथरी/ १८ फागुन
मोरङको पथरी शनिश्चरे नगरमा फागुन २८ गतेबाट चैत ४ गतेसम्मको एक साता अवधिमा घर घरमा पुगेर हात्तीपाइले विरुद्धको औषधि खुवाइने भएको छ । आम औषधि सेवनका लागि योजना तय गर्न आज नगरपालिका कार्यालयमा आयोजित ‘पालिकास्तरीय योजना तर्जुमा तथा बहुनिकाय गोष्ठी’मा कार्यक्रमलाई प्रभावकारी बनाउन वडा वडामा जनचेतना तथा प्रचार प्रसार कार्यक्रम गर्ने निर्णय भएको छ ।

राष्ट्रिय हात्तीपाइले रोग निवारण कार्यक्रम अन्तर्गत ११ औं चरणको हात्तीपाइले विरुद्धको आम औषधि सेवन अभियानका रुपमा नगरका स्वास्थ्यकर्मी र महिला स्वास्थ्य स्वयमसेविकामार्फत औषधि सेवन गराइने छ ।
नगर प्रमुख दिलीपकुमार राईले औषधि अनिवार्य रुपमा सेवन गर्नका लागि सवै पक्षको प्रचारात्मक अभियान सहितको सहकार्यले हात्तीपाइले रोगलाई निर्मूल गर्न सकिने भएकाले सवैलाई यो अभियानमा सामेल हुन आव्हान गर्नुभयो । औषधि सेवनमा कोहि छुटेमा उनीहरुबाटै पुन रोग सर्ने भएकाले अभियानमा सवै सामेल हुनुपर्ने प्रष्ट्याउँदै त्यस्तो आव्हान गर्नुभएको हो ।
भोलीबाट वडास्तरीय सचेतना तथा प्रचारात्मक कार्यक्रम थालिने र अभियानमा खटिने स्वास्थ्यकर्मीलाई भोली र पर्सी तालिम प्रदान गर्ने निर्णय भएको छ । औषधि कम सेवन भएको क्षेत्रको पहिचान गर्नुका साथै महिला स्वास्थ्य स्वयमसेविकाहरुलाई तालिम, विद्यालय शिक्षा, पत्रकार सम्मेलन गरेर प्रचार प्रसारलाई व्यापक बनाइने स्वास्थ्य शाखाका प्राविधिक एकराज खत्रीले जनाउनु भयो ।
क्युलेक्स जातको पोथी लामुखट्टेबाट सर्ने सो रोगको विरुद्ध यस वर्षदेखि लगातार ३ वर्षसम्म थप औषधि सहितको आइडीए औषधि सेवन विधिको क्रम सुरु भएको जनाइएको छ । गर्भवती महिला, ७ दिन भित्रको सुत्केरी, २ वर्षसम्मका बालबालिका, ओछ्यान परेका विरामी, क्षारे रोगका विरामीले बाहेक सवैले सो औषधि सेवन गर्न मिल्ने जानकारी गराइएको छ ।
स्वास्थ्य शाखाका जगतप्रसाद मगरले हात्तीपाइले रोगको जानकारी सम्बन्धी सहजिकरण गर्नुभएको कार्यक्रममा नगर उपप्रमुख यमुना विष्ट वास्तोला, प्रमुख प्रशासकीय अधिकृत लक्ष्मीप्रसाद खरेल, उपसचिव शालिग्राम काफ्ले सहितको सहभागिता रहेको थियो । कार्यक्रममा वडाध्यक्ष, ज्येष्ठ नागरिक, अस्पताल संचालक, शिक्षक संघसंस्थाका प्रतिनिधि, सुरक्षा निकाय र स्वास्थ्य शाखाका प्रतिनिधिको सहभागिता गराइएको थियो ।
















