विराटनगर/ तीन पांग्रे सिटी सफारी (ई रिक्सा) को नविकरण,रुट इजाजत तथा जाचपास विराटनगर महानगरले आफै गर्ने भएको छ । महानगरले बिहिबार एक कार्यक्रम गर्दै सिटी रिक्सा चालकहरुलाई सवारी साधन चलाउने अनुमती पत्र प्रदान गरेको छ । मेयर भीम पराजुली र उपमेयर इन्दिरा कार्कीले सम्युक्तरुपमा अनुमतिपत्र वितरणको शुभारम्भ गरेका थिए ।
महानगरले केही समय अगाडी तीन पांग्रे इ रिक्साको नविकरण र रुट इजाजतका लागि महानगरमै सम्पर्क राख्न र कर तिर्न आग्रह गरेको थियो । महनगरमा दर्ता भइ चल्ने सिटी रिक्साहरुले सवारी अनुमतिपत्र पाएका छन् । कार्यक्रममा बोल्दै मेयर पराजुलीले सिटी रिक्साको पूर्ण व्यवस्थापनका लागि यो नियम ल्याइएको र प्रभावकारी हुने विश्वास व्यक्त गरे । प्रदेश यातायात व्यवस्था कार्यालयले जारी गरेको इजाजत पत्रको आधारमा वितरण गरिने राजस्व महाशाखा प्रमुख राजेन्द्र प्रधानले बताए ।
प्रदेश सवारी तथा यातायत व्यवस्थापन ऐन २०७६ तथा प्रदेश सवारी तथा यातायत व्यवस्था नियावली २०७७ र विराटनगर यातायात व्यवस्थापन कार्यविधि २०७७ बमोमि नविकरण,रुट इजाजत तथा जाचपास लगायतका कार्यहरु थालनी गरिएको प्रधानले जानकारी दिए । उनले रिक्सा दर्ता गर्न आउने क्रम जारी रहेका कारण केही समयमै रिक्साको संख्या पनि एकिन हुने बताए । कार्यक्रममा वडा नं.५ का वडाध्यक्ष मीनकुमार आचार्य,नगरप्रहरी प्रमुख राजन पौडेल लगायतको सहभागिता रहेको थियो ।
