साइनो समाचारदाता
झापा । झापाको बिर्तामोड नगरपालिका वडा नं ५ मनमोहन अस्पताल अगाडि हायस माइक्रो गाडी ठक्करबाट एक जनाको मृत्यु भएको छ । शुक्रबार राति पश्चिमबाट पूर्वतर्फ जाँदै गरेको बा ४ ख ५१०० नम्बरको गाडीले बाटो काट्दै गर्दा पैदल यात्रीलाई ठक्कर दिएको थियो ।
ठक्करबाट घाइते भएका मेचीनगर नगरपालिका ११ धाइजनका ६८ वर्षीय विर्खध्वज काम्वाङको उपचारका लागि लैजाँदै गर्दा बाटोमै मृत्यु भएको प्रहरीले जनाएको छ । हायस चालक झापाको भद्रपुर १ का ३८ वर्षीय बाबुराम कट्टेललाई नियन्त्रणमा लिएर घटनाको अनुसन्धान सुरु गरिएको प्रहरीले जानकारी दिएको छ ।
















