साइनो समाचारदाता । सोमबार साँझ मोटरसाइकलमा लागुऔषध लिएर हिँडिरहेको अवस्थामा प्रहरीले मोरङको केराबारीबाट एक महिलासहित तीन जनालाई पक्राउ गरेको छ । केराबारी गाउँपालिका–५ का २२ वर्षीय रुपेश राई, सुनसरीको धरान–८ की ३० वर्षीया अविमाया राई र २० वर्षीय उत्सव लिम्बूलाई पक्राउ गरिएको प्रहरीले जनाएको छ ।
इलाका प्रहरी कार्यालय बेलबारीका प्रहरी निरीक्षक ऋषिराज ढकालका अनुसार कोे १० प ७६९३ नम्बरको मोटरसाइकलमा रहेका उनीहरुलाई मुगु खोला छेउबाट पक्राउ गरिएको हो । पक्राउ परेकाहरुको साथबाट डाइजेल्याप ९५, एभिल ९४ र लुपिजेसिक ९७ गरेर दुई सय ८६ एम्पुल लागुऔषध बरामद भएको छ । तीनै जनाविरुद्ध लागुऔषध ऐन अन्तर्गत मुद्दा चलाउन मंगलबार म्याद थप गरेर अनुसन्धान अघि बढाइएको प्रहरीले जनाएको छ ।
















