साइनो समाचारदाता । म्युजिक भिडिओमा झण्डा जलाउने समूहका नौ जनालाई नेपाल प्रहरीले पक्राउ गरेको छ । काठमाडौंबाट प्रहरीको विभिन्न युनिटबाट खटिएको टोलीले बुधबारसम्म नौ जनालाई पक्राउ गरेको हो ।
’मङगोल हप’ नामक युट्युब च्यानलबाट सोमबार सार्वजनिक भएको ’देशद्रोही’ नामको गीतमा राष्ट्रिय झण्डा जलाइएको थियो । त्यसको चौतर्फी विवाद भएपछि नेपाल प्रहरीले आफ्ना विभिन्न युनिटहरू खटाइ यस घटनामा संलग्नहरूलाई पक्राउ गरेको हो । थप चार जनालाई केन्द्रीय अनुसन्धान ब्युरोबाट खटिएको टोलीले पक्राउ गरेको हो । नेपाल प्रहरीले जारी गरेको विज्ञप्तिमा अहिलेसम्म नौ जना पक्राउ परेको उल्लेख छ।उक्त घटनामा संलग्न सबैको खोजी भइरहेको प्रहरीले जनाएको छ ।
पक्राउ पर्नेमा गायक तथा झण्डा जलाउने ग्याल्जोङ दोर्जे तामाङ पनि रहेका छन् । उनीहरूविरूद्ध राज्य विरूद्धको अपराध, साइबर अपराध र राष्ट्रिय झण्डा जलाएको लगायतमा अनुसन्धान आकर्षित हुने महानगरीय अपराध महाशाखाका एसएसपी दीपक थापाले बताए । उनका अनुसार थप अनुसन्धान गर्न नौ जनालाई महानगरीय प्रहरी परिसरमा पठाइएको छ । उक्त म्युजिक भिडिओ मकवानपुरको बागमती गाउँपालिका ३ स्थित सल्लेनीको विष्णु आधारभूत विद्यालयमा खिचिएको महाशाखाले जनाएको छ ।
















