साइनो समाचारदाता
रौतहट । रौतहटमा कोरोनाबाट निको हुनेहरुको संख्या १ हजार ३ सय २२ पुगेको छ । जेठको पहिलो सातासम्म जिल्लाका आइसोलेसनहरुमा १ हजार ३ सय २८ संक्रमित थिए । हाल ६ जना मात्रै उपचार गराइरहेका छन् । अहिले उनीहरुको स्वास्थ्य अवस्था समान्य रहेको छ ।
संक्रमितको संख्या एकै पटक बढेपछि आइसोलेसनको अभावका कारण राजपुर र ईशनाथ नगरपालिकाले संक्रमितहरुलाई क्वारेन्टाइनमै राखेका थिए । अहिले बिरामीहरु धमाधम कोरोना जितेर घर फर्किसकेको प्रमुख जिल्ला अधिकारी बसुदेव घिमिरेले सुनाए । ‘अहिले नै ढुक्क हुने अवस्था छैन,’ उनले भने, ‘अहिले ६ जना मात्र संक्रमति रहे पनि समुदायमा फैलियो भने संख्या बढ्न सक्छ । त्यसैले सबै सजग हुनु जरुरी छ ।’
उनले ‘हटस्पट’ को रुपमा चिनिएको जिल्लामा संक्रमतिहरु कुनै समस्या बिना घर फर्कनु सुःखद भएको सुनाए । जिल्ला प्रशासनको तथ्यांक अनुसार शनिबारसम्ममा १ हजार ३ सय २८ जनामा संक्रमण पुष्टि भइसकेको छ । ती मध्ये १ हजार ३ सय २२ जना कोरोना जितेर घर फर्किसकेका छन् ।
















