साइनो समाचारदाता
विराटनगर । मुख्यमन्त्री तथा मन्त्रिपरिषदको कार्यालयले प्रदेश १ सरकार मातहत रहेका कार्यालय र मन्त्रालयको कामको अनुगमनका लागि ‘चिफ मिनिस्टर ड्यास बोर्ड’ सञ्चालनमा ल्याएको छ । शुक्रबार ड्यास बोर्डको सुभारम्भ गर्दै प्रदेश १ का मुख्यमन्त्री शेरधन राईले अनुगमनका लागि डिजिटल माध्ययम तयार भएको बताए ।
स्वीस सरकारको सहयोगमा निर्माण गरेको ड्यासबोर्डबाट प्रदेश सरकार मातहतका मन्त्रालय र अन्य विषयगत कार्यालयको कार्य प्रगति विवरण समावेश गरिनेछ । जवाफदेहिता र सुशासनको प्रत्याभूति दिने गरी ड्यासबोर्ड सञ्चालनमा ल्याइएको मुख्यमन्त्री शेरधन राईले बताए । डिजिटल माध्ययमबाट कार्यलयमा बसेर सबै मन्त्रालयको अनुगमन गर्न सकिने उनले बताए । ड्यासबोर्डबाट मातहतका कार्यालयले गरेको कामको मूल्याङकन गरेर नियमित प्रगति विवरण सामाजिक सञ्जालमार्फत सार्वजनिक गर्ने मुख्यमन्त्री राईले बताए ।
पहिलो चरणमा प्रदेश सरकार मातहत कार्यालयलाई जोडेको बताउँदै उनले प्रदेशका १३७ वटै स्थानीय तहलाई ड्यासबोर्डमा जोड्ने उनले बताए । मन्त्रालयहरूको कार्य प्रगतिको अवस्था छुट्याउन हरियो, निलो, पहेँलो र रातो रंगले संकेत गरिएको छ । हरियो रंगले राम्रो र रातो रंगले कमजोर विवरणको संकेत गर्नेछ । निलोले मध्यम, पहेँलोले सामान्य प्रगति रहेको विवरण दिनेछ ।
















