
साइनो समाचारदाता
पथरी । मोरङको पथरी शनिश्चरे नगरपालिकाको सहयोगमा पहिलो पटक देशव्यापी खुला अनलाइन नाटक प्रतियोगिता गरिएको छ ।

बासमा अभियनय गर्दै कलाकार ।
सोमबार आदिकवि भानुभक्त आचार्यको जन्म जयन्तीको सन्दर्भ पारेर भएको प्रतियोगितामा २९ वटा नाटकहरु छानिएका थिए । छानिएका उत्कृष्ठ ५ बाट मोरङकै झोराहाट नाट्य समूहको ‘बास’ नामक नाटक पहिलो बनेको छ । सुदिपजंग कार्कीको निर्देशन तथा अभिनयमा प्रदीप सरदार र अनु श्रेष्ठले साथ दिएका थिए । जुम्लाका गणेश उपाध्यायको निर्देशनमा उनको तेहेरो चरित्रको खस भाषाको नाटक निसाफ दोस्रो भएको छ । क्रियटिभ एकेडेमी काठमाडौं किर्तिपुरको वितिसा महर्जनको एकल प्रस्तुतिको नाटक तृतीय भइ पुरस्कृत बन्न पुगेको छ । महर्जनले बधु शिक्षा शिर्षकको नाटक प्रद्धर्शन गरेकी थिइन् । काठमाडौंका प्रभाकर न्यौपानेको निर्देशनको नाटक र पथरीशनिश्चरेका आकाश तिम्सिनाको निर्देशनको नाटक सान्त्वना भएको छ । प्रतियोगिताबाट छनौट पहिलो, दोस्रो र तेस्रो हुने नाटकलाई क्रमशः २५ हजार, १५ हजार र १० हजार नगद प्रदान गरिएको थिएटर निर्देशक जीवन बरालले जनाए । सान्त्वना २ नाटकलाई ३,३ हजार पुरस्कार प्रदान गरिएको छ । टाढा भएका समूहलाई बैंकबाट पुरस्कार रकम पठाइएको छ ।
समितिले पहिलो नगरस्तरीय अनलाइन एकल लोकनृत्य प्रतियोगिता पनि गरेको छ । प्रतियोगितामा नगरका १९ वटा नृत्य समावेश भएका थिए । जसमध्ये जयन्ती लिम्बू, नाइमा राई र प्रतिमा दर्नाल क्रमशः पहिलो, दोस्रो र तेस्रो भइन् । जीवन विश्वकर्मा र ऐश्वर्या राई सान्त्वना तथा जस्ना ढुंगाना पब्लिक च्वाइसको पुरस्कारबाट पुरस्कृत बनिन् । २ मिनटको नृत्यको भिडियोलाई मुल्यांकन गरी पहिलो हुनेलाई २५ हजार, दोस्रोलाई १५ हजार र तेस्रोलाई १० हजार नगद प्रदान गर्नुका साथै नृत्य प्रशिक्षण समेत प्रदान गरिने प्रवद्र्धन समितिको गीत संगीत विभाग संयोजक एवम् कार्यक्रम संयोजक देव गुरुङले जनाए । सान्त्वनालाई ३, ३ हजार तथा पब्लिक च्वाइसलाई २ हजार नगदले पुरस्कृत गरिएको छ ।
कार्यक्रमका प्रमुख अतिथि पथरीशनिश्चरे नगर प्रमुख दिलीपकुमार राईले पुरस्कार वितरण गर्दै सृजनाको क्षेत्रमा नगरले सधैं प्रोत्साहन गरिरहने प्रतिवद्धता जनाएका छन् । कार्यक्रममा जिल्लाका अगुवा नाट्यकर्मी भरत गुरागाईंले कला साहित्यको क्षेत्रमा प्रत्येक पालिकाहरुले योजना बनाउनु आवश्यक रहेको चर्चा गरे ।
















