साइनो समचारदाता
पथरी । बलात्कार गरेर १६ वर्षीया बालिकालाई गर्भवती बनाएको अभियोगमा मोरङको पथरीशनिश्चरे नगरपालिका– ८ का ४८ वर्षीय राजन लिम्बूलाई प्रहरीले पक्राउ गरेको छ ।
लिम्बूले दलित परिवारकी बालिकालाई छ महिनादेखि पटक–पटक बलात्कार गरेको आरोप छ । इलाका प्रहरी कार्यालय पथरीका डीएसपी दिलिप गिरीले स्वास्थ्य परीक्षणबाट बालिकाको पेटमा पाँच महिनाको गर्भ रहेको खुलेको पूर्वेली न्यूजलाई बताए । उनकाअनुसार स्वास्थ्य परीक्षणका लागि बालिकालाई बिहीबार कोसी अस्पताल विराटनगर ल्याइएको थियो । लिम्बूले विभिन्न डर, धम्की देखाएर बलात्कार गरेका कारण आफू गर्भवती हुँदा पनि घटना बाहिर ल्याउन बालिका डराएको डीएसपी गिरीको भनाइ छ । उनकाअनुसार लामो समयदेखि महिनावारी रोकिएर पेट बढ्दै जानुका साथै खान समेत मन नगर्ने गरेपछि अभिभावकले सोधपुछ गर्दा बलात्कारबाट पीडित बनेकी बालिका गर्भवती समेत रहेको खुलेको हो । बालिकाका अभिभावकले जाहेरी दिएको थाहा पाएर भाग्दै गरेको अवस्थामा लिम्बूलाई बिहीबार राति पक्राउ गरिएको प्रहरीले जनाएको छ । उनी विरुद्ध जवरजस्ती करणी मुद्धा चलाउन अनुसन्धान सुरु गरिने प्रहरीको भनाइ छ । डीएसपी गिरीले बलात्कार पीडित गर्भवती बालिकालाई भने संरक्षणका लागि ओरेक नेपालको जिम्मा लगाइएको बताए ।

















