साइनो समाचारदाता
काठमाडौ । काठमाडौंको राष्ट्रिय जनस्वास्थ्य प्रयोगशालामा आज गरिएको नमुना परीक्षणमा थप दुईजनामा कोरोना (कोभिड १९) संक्रमित भएको पुष्टि भएको छ ।
कपिलबस्तु नगरपालिका ८, का १६ र २२ वर्षीय पुरुषमा कोरोना भाइरसको संक्रमण भएको स्वास्थ्य तथा जनसंख्या मन्त्रालयका सहप्रवक्ता डा. समिरकुमार अधिकारीले जानकारी दिएका हुन् । राति ८ः३० बजे विज्ञप्ती जारी गर्दै उनले संक्रमितको अवस्था सामान्य रहेको र स्वास्थ्यकर्मीको सम्पर्कमा रहेको जनाए । कपिलबस्तुमा संक्रमितको संख्या थपिएपछि देशैभर संक्रमितको संख्या १ सय १ पुगेको छ ।
हालसम्ममा पीसीआरबाट १४ हजार ५ सय ११ जनाको परीक्षण गरिएको मध्ये १४ हजार १ सय १० जनामा संक्रमण नदेखिएको मन्त्रालयको वेवसाइटमा उल्लेख छ । आरडीटीबाट ५४ हजार ९३ जनाको परीक्षण गरिएको, १७ हजार ३द सय ७२ जना क्वारेन्टाइनमा रहेको, १ सय ३३ जना आइसोलेसनमा रहेको र २२ जना निको भएका छन् । विश्वभरीमा ३६ लाख ३४ हजार १ सय ७२ जनामा संक्रमित देखिएको र २ लाख ५१ हजार ४सय ४६ जना कोरोनाबाट मृत्यु भएको विश्व स्वास्थ्य संगठनले बताएको छ ।

















