साइनो समाचारदाता
दमक । राई सामुदायको प्रतिनिधिमूलक संस्था किरात राई यायोक्खा जिल्ला कार्य समिति झापाले स्मारिका प्रकाशन गर्ने भएको छ ।

जिल्लामा यायोक्खा स्थापना भएको करिब ३० वर्षको संस्थागत गतिविधि अभिलेखीकरण गर्ने उद्देश्यले प्रकाशन गर्न लागेको हो । ‘किरात राई यायोक्खा झापा स्मारिका २०७६’ नामक स्मारिका प्रकाशनका लागि स्मारिका प्रकाशन उपसमिति गठन गरिएको छ । सुशन रुङमाहाङ राईको संयोजकत्वमा ७ सदस्यीय स्मारिका प्रकाशन उपसमिति निर्माण गरिएको हो । फागुन पहिलो हप्तासम्म प्रकाशन गरिसक्ने लक्ष्य राखिएको स्मारिकाका लागि आवश्यक छलफल, अन्तरक्रियासँगै लेख रचना संकलन साथै आर्थिक रकम संकलन भइरहेको छ । करिब १० लाख ६० हजारको अनुमानित लागतमा प्रकाशन सम्पन्न हुने स्मारिका प्रकाशन समिति सदस्य केडी रार्ईले बताए । ‘स्मारिका प्रकाशन सहयोगका लागि व्यापार व्यवसायी÷संघ संस्थाहरुको शुभकामना÷सूचना÷विज्ञापनवापत् रकम संकलन गर्नेछौं ।’ उनले भने, ‘किरात राई यायोक्खा झापा स्मारिका २०७६ प्रकाशन सहयोगी भनेर रु १ हजार भन्दा माथि रकम संकलन भइरहेकाले सबैको सहयोगको अपेक्षा गर्दछौं ।’ प्रकाशन सहयोगार्थ रु १ हजार भन्दा माथि प्राप्त रकम स्मारिका प्रकाशन सहयोगी भनेर प्रकाशन गरिने र एक प्रति स्मारिका प्रदान गरिने बताइएको छ । प्रकाशन सहयोगीतर्फ ५ हजार भन्दा माथि प्रदान गर्नुहुने सहयोगीहरुको फोटो (संक्षिप्त पारिवारिक विवरण) सहित स्मारिकामा प्रकाशन गरिने र एक प्रति स्मारिका प्रदान गरिने प्रकाशन समितिका सदस्य सुशिल कुमार राईले बताए ।
स्मारिकामा झापामा बसोबास गर्ने किरात राई समुदायको इतिहास र वर्तमानको अवस्था, उनीहरुको सामाजिक, आर्थिक, राजनीतिक, शैक्षिक अवस्था, लोक साहित्य, मौलिक सम्पदाहरुको चिनारी, भाषा, परम्परा, भेषभुषा लगायतको विषयवस्तु समेटिने स्मारिका प्रकाशन उपसमितिका संयोजक सुसन रुङमाहाङले बताए । झापाभरीका किरात राई यायोक्खाका आजीवन सदस्यहरुको नामावली, किरात भवन सहयोगीहरुको नामावली, सुप्तुलुङ छेन्बी लोक्ता, यायोक्खा झापाको मातहतमा रहेका विभिन्न कोषहरुको विवरण स्मारिकामा राखिने छ । यायोक्खा झापा जिल्लाको मातहतमा रहेका सम्पूर्ण गाउँनगर तथा प्रारम्भीक समितिहरुको समेत स्थापना भए देखि हालसम्मका सम्पूर्ण गतिविधिहरु स्मारिकामा समेटिने छ । झापामा ३७ वटा प्रारम्भीक कार्य समिति रहेको छ भने ५ वटा भातृ संगठनहरु चलायमान रहेको छ । गत कार्तिक ३० गते बसेको यायोक्खाको बैठकले स्मारिका प्रकाशन गर्ने निर्णय गरेको हो ।
















