साइनो समचारदाता
पथरी । सहकारी कर्मचारी संगठन पथरी शनिश्चरे इलाका समितिले एकीकृत सूचना प्रणाली (कोपोमिस) अभिमुखिकरण तालिम सम्पन्न गरेको छ । तालिम विहिवारदेखि सुरु भएको थियो ।
नगरका ३४ सहकारीका ३४ कर्मचारीले सहभागिता जनाएको तालिमलाई कल्याण बजगाईले सहजीकरण गरेका थिए । गरिबी निवारण तथा सहकारी मन्त्रालयले सबै सहकारीलाई ३ बर्ष भित्र एकीकृत सूचना प्रणाली (कोपोमिस)मा आउन आह्वान गरेको थियो । सरकारले २०७४ कार्तिकमा सहकारी ऐन सुरु भए देखि नै कोपोमिसको प्रयोगमा जोड दिइएको हो । सहकारी ऐनका अनुसार ५ करोड भन्दा कम पुँजीका सहकारीले ३ वर्ष भित्रमा र ५ करोड भन्दा वढी पुँजी भएका सहकारीले १ वर्ष भित्रमा कोपोमिसको प्रयोग सुरु गरिसक्नुपर्ने जनाइएको छ ।
तालिम समापन कार्यक्रममा जिल्ला बचत तथा ऋण सहकारी संघका सचिब एकराज निरौलाले स्थानीय सहकारी ऐन पास भएको वा नभएको बारे जिज्ञासा राखेका छन् । सहकारीका लागि स्थायी कोष बनाउनु पर्ने बताउँदै उनले नगरका सहकारीहरु एकीकरण गर्नुपर्नेमा जोड दिए । उनले भने, ‘नगरका ६८ सहकारी एकीकरणका लागि पहल गर्न आवश्यक छ । ४१ बचत तथा ऋण एकीकरण गर्दा पुँजी १ अरब हुन्छ ।’ नगर प्रमुख दिलिप कुमार राईले स्थानीय तहको एकल अधिकारलाई संघीय सरकारले कुन्ठित पारेको दाबी गरेका छन् । उनले सहकारी ऐन कानुन बन्ने क्रममा रहेको बताएका छन् । ऐन संघ र प्रदेश सरकारले बनाएपछि मात्र बनाइने जनाएका छन् । वडा नम्बर ७ का अध्यक्ष एवम् सामाजिक विकास समितिका संयोजक कपिलमणि ढकाल, जिल्ला सहकारी संघका योगराज पौडेल, सहभागीद्वय आरति सहकारीकी सुस्मा मगर, कन्तुर सहकारीका राजेन्द्र भट्टराईलगायतले बोलेका थिए ।
एकीकृत सूचना प्रणाली कसरी चलाउने भन्ने बारेमा सबै कर्मचारीमा ज्ञान नभएका कारण कर्मचारी संगठनले अभिमुखिकरण तालिम आयोजना गरेको हो । संगठनका अध्यक्ष गणेशकुमार बाछाना राईले कोपोमिस तालिम सहकारी संघसंगठनले आयोजना गरेको देशकै पहिलो कार्यक्रम गरिएको बताएका छन् । कार्यक्रममा सहभागीहरुलाई प्रमाणपत्र र अतिथिहरु आयोजकले मायाको चिनो वितरण गरेका थिए ।
