एमसीसी परियोजना बारे सरकार आफै अन्योलमा छः अध्यक्ष यादब - Sainokhabar
  • शुक्रबार, फागुन १४, २०७७

एमसीसी परियोजना बारे सरकार आफै अन्योलमा छः अध्यक्ष यादब

साइनो समाचारदाता

उदयपुर । समाजवादी पार्टीका अध्यक्ष उपेन्द्र यादवले एमसीसी परियोजना बारे सरकार अन्योल र अस्पष्ट रहेको आरोप लगाएका छन् । अध्यक्ष यादवले हाल चर्चामा रहेको एमसीसी परियोजनालाई सरकारले संसद्मा प्रस्तुत गर्नुपर्ने धारणा राख्नुपर्ने बताए । उनले भने ‘यो विषय सरकारले सदनमा प्रस्तुत गर्ने हो । तर सरकार आफै यसबारे अन्योल र अस्पष्ट देखिन्छ ।’

सोमबार उदयपुरको गाइघाटमा समाजवादी पार्टी प्रदेश नम्बर १ समितिले आयोजना गरेको पत्रकार सम्मेलनमा बोल्दै अध्यक्ष यादवले सो आरोप लगाएका हुन् ।
यादवले सरकार असफल भएको आरोप लगाएका छन् । ‘आर्थिक वर्षको ७ महिना बित्न लाग्दा १७ प्रतिशत मात्र बजेट खर्च भएको छ । भ्रष्टाचार बढेको छ । देशमा विभिन्न समस्या छन्, समाधान गर्न सरकार असफल भएको छ ।’ उनले भने । देशमा लगानी भित्राउन तामझाम गरेर लगानी सम्मेलन गरिएको स्मरण गराउँदै उनले लगानी सम्मेलन गरेपनि लगानी नआएको छ । नेकपा नेतृत्वको सरकारमा डेढ वर्ष सहकार्य गर्दा पनि संविधान संशोधनको लिखित प्रतिवद्धता कार्यान्वयन गर्न प्रधानमन्त्री केपी ओलीले नचाहेका कारण त्यो यात्रा टुङ्ग्याइएको उनले स्पष्ट पारे । यादवले संविधान संशोधनको माग पूरा नगर्ने नेकपा नेतृत्वको सरकारको हठ मूर्खता हो भन्दै सदन र सडकबाट बाध्य पारिने चेतावनी समेत दिए । सूचना विधेयक, विशेष सेवा ऐन विधेयक ल्याउने सरकारी तयारीप्रति टिप्पणी गर्दै यादवले नागरिकको अभिव्यक्ति स्वतन्त्रतामाथि सरकारी नियन्त्रणको प्रयास भैरहेको आरोप लगाए । ’सरकारको कदम हेर्दा यो सरकार सर्वसत्तावादतर्फ उन्मुख देखिन्छ ।’

यादव पार्टी १ नम्बर प्रदेश समितिले आयोजना गरेको २ दिने प्रादेशिक प्रशिक्षण कार्यक्रममा सहभागी हुन गाइघाट आएका थिए । प्रशिक्षण आइतबार र सोमबार दुई दिनदम्म चलेको समाजवादी पार्टी प्रदेश नं १ अध्यक्ष प्रवीण चाम्लिङले जानकारी दिए ।

सम्बन्धित खवर